نصائح عامه في التشطيبات
نصائح عامة في التشطيبات..
لو شقتك على شارع ضيق وعندك بلكونة مجروحة ،قفلها الوميتال وكبر الصالة أفيدلك
والألوميتال أنواع كتير أفضل قطاعاته شريف علي حسن.
الدهانات البلاستيك أحسن من الزيت بس تجيب نوع نضيف (چوتن سايبسناشيونال _سكيب).
الباب المصفح التركي أو الايطالي أفضل
ومتركبش المسامير الصغيرة اللي بتيجي مع الباب هات مسامير بفشر طويلة من عند الموان.
سيراميك الحوائط حاجة والأرضيات حاجة.
أحسن سيراميك الجوهرة وكليوباترا و آرت، ولو عايز رخيص هات ليسيكو أو اينوفا.
لو نفسك تركب بورسلين ومستغلي ثمنه ،
هات سيراميك قطع ليزر هيكون أرخص شوية وشيك جداً
إياك ثم إياك تجيب بورسلين صيني بيفك بعدها بشهر.
هات الخلاطات إيديال ستاندارد عشان تعيش معاك بدل ما كل شوية تغيرهم.د
ارتفاع حوض الحمام عن الارض من 82 _85 سم
ولو الحوض فوق رخامة ينزل مقام سمك الرخامة
يفضل كمان إن خلاط الحمام يبقي بقنطرة عالية أو متوسطة الارتفاع بتريح في الاستعمال.
3
زود فيش كهرباء في الحمام
*ملحوظة هامة :الحوض النص ركبة شكله جميل وبينضف الارض بس مشكلته لو الصرف لا قدر الله اتسد.
في تأسيس السباكة هات كل مواسير المياه واكسسواراتها باننجر أو اكواثيرم أو br أو الشريف.
والصحي ديورافيت ضمان مدي الحياة بس البانيو هات بانيو الطيب متجبش اي ماركة تاني.
صرف التكييفات مهم والله العظيم لازم تعمل حسابه حتي لو مفيش تكييفات في الاول.
خلي الكهربائي يعمل زرار تشغيل وغلق للشفاط في المطبخ والحمام عشان الحبل لو اتقطع لا قدر الله يبقي الزرار شغال.
هام جدا الشفاطات لازم تكون ماركة محترمة عشان تعيش
-ماتسترخصش في أسلاك الكهرباء وهات السويدي الأصلي (عشان في مضروب) أو السمكتين أو اسكندرية.
هات لقم ومفاتيح الكهرباء معروفة واحذر اللي ملوش اسم لأنه كل شوية هيضرب.
اصرف عالمحارة على قد ماتقدر وهات صنايعي نضيف وغالي لان عيوبها بتعمل بلاوي ومابتتصلحش وبتاع المصيص قوله مش عايز جبس مقتول وهو هيفهم .. عشان ميقشرش المعجون.
زود فيش كهرباء كتير في كل حته مش هتخسر بس هتفيدك جداً.
الاضاءة خليها كلها لمبات لد هتدعيلي وانت بتدفع فاتورة الكهرباء.
لو أمكن يبقى عندك حمامين هيبقى أفضل.
هات سخان كبير لو المطبخ والحمامات علي خط واحد.
ميول السيراميك بتبقي جوة الحمام والمطبخ الله يرضي عنك.
سيراميك الحوائط بيوصل لغاية قبل السقف بحوالي 5 سم عشان بعد ماتخلص تركب كورنيشة خشب أو جبس عشان الشكل.
هات أكر البيبان غالية ومتينة عشان لو رخيصة عيالك هيبوظوها بعد شهر.
في السيراميك :
لو الأوضة أو الطرقة أضلاعها منتظمة ممكن تعمل السيراميك عدل، لكن لو مش منتظمة والحيطان مايلة اعمله سمبوكسات (زاوية 45) عشان تداري العيب بس لاحظ ان الزاوية 45 بتزود في عدد امتار السيراميك حبة صغيرين عشان الهدر
واهتم كتير قبل تركيب السيراميك بنضافة الشقة من الرتش وبواقي الجبس قبل ما تفرش الرمل
سقية السيراميك كويس جداً جداً جداً من أهم مراحل تركيب السيراميك خد بالك.
الرطوبة اللي بتظهر في الحيطة وتقشر الدهان ملهاش اي علاج سريع.
(حلها النهائي لازم المحارة تتكسر وتتنشف كويس بالبشبوري وبعدين نجيبلها مادة عازلة من كيماويات البناء الحديث وتتضاف علي أسمنت المحارة مع إضافة مادة السيكا مع مونة المحارة للأسف هو ده الحل الوحيد).
لازمٱ وحتما ولا بد ان مبيض المحارة يحط سلك شبك في أماكن التقاء الخرسانة مع الطوب ، وإلا هتشرخ بعدين ومش هتتعالج.
بلاعة المطبخ ضروري جدا تكون في اقرب مكان لباب المطبخ وياريت ميزيدش مقاسها عن 10 *10.
رخامة المطبخ ماينفعش تبقى رخام ، لازم جرانيت لأن الرخام هيتنقر ويشرخ ولو هتعمل كابينة شاور من (غير بانيو) في الحمام يستحسن تعمل ارضية الكابينة جرانيت مش سيراميك ومن رأيي خلي منسوب الكابينة اوطي من منسوب باقي الحمام.
ماتعملش شباك مناولة للمطبخ وحواليه طوب حراري، عشان الموضة دي بطلت من أيام المماليك.
هام :اللي هيعملك المطبخ هاته الاول قبل ما تأسس سباكة وكهربا عشان يصمم الاول مكان الوحدات والدواليب وهو اللي يقترح عليك مكان الحوض والغسالة اطباق وملابس وفيش الكهربا مش السباك.
هام جدا يفضل الغسالة تكون في المطبخ قدر الإمكان
بخار المية في الحمام بيبوظها.
البلكونة هاتلها دهانات خارجية (كومبليكو) أو خلي مبيض المحارة يعملهالك (جرافياتو) أو قوله (مادة) وهو هيفهم.https://youtu.be/cgohsbfE-44
تعليقات
إرسال تعليق